خربشة الدين مع خطوط العالم - كتبت: ربى مهداوي

وطن: رحت اعمل شوبينج زي هالناس... بجوز اقدر اغير جو وانسی هالعالم الكوني الي كله حكايات بوضوحها وغموضها الذاتي مع الانسان، المجتمع، السياسة والاقتصاد .. ما لقيت غير بين أيدي كرة العالم بحجم صغير ....حركتها.. لقيت رسومات بألوان مختلفه ...دخلت بعالم الخيال الخاص في ...و حاولت اوزع الوان كرة العالم... عجبني تفرع لون الأسود .. اتذكرت فيها الديانات السماوية خاصة اليهودية والمسيحية والإسلام  إلى مأخذ دور البطولة بوقتنا الحالي... بعدها اتذكرت الطوائف والمذاهب .... قعدت افكر طيب اذا كل الديانات هدفها إنهاء الشر والبقاء بالخير ..طيب شو  هالاسس  الي حددوا فيها هالخير... وإذا الإنسانية  مزروعة داخلنا ليه منحب القتل والذبح .. واذا بدنا نزرع الخير باوساط مجتمعنا وبيئتنا ليه عم نفقدها بتصرفاتنا ... واو الوطن العربي برسمته الجغرافية صغير... وكله جنون سياسي يا دوب حجم بؤرة عيني.. وهالعالم الي بحاوطه كله بحور ومضايق وانهر ومحيطات... طيب كيف هالعالم ممكن ينشر الخير... لازم يكون عندي ضحية دينية حتى اقتل البشرية .. بعدها لفت انتباهي الخط الأخضر الي ملزق بالأسود شبهته بالخير طيب اذا هو مزروع بكل الجهات وبيأخذ خط واحد مع هالعالم ليه عنا شر بالاساس.... اذا كلنا بدنا هذا الخط... بحثت عن لون خافت للاخضر حتى اشبه بالشر بس ما لقيت... استغربت كل مذابح هالعالم ومافي شر ..بعدها أدركت انه خط الأحمر هم (البشر ) انفسهم الي عم بزرعوا بداخلهم الانسانية حسب منهج الحاجه... والاغرب انه هالخط حامل درجات من لون الاحمر ..منه الخافت ..الي بحاول يظهر الخير وكل حياته خربشه حربية مع سلمية....وفي لون معتدل إلى كله إنسانية وخير... وفي لون فاقع الي واضح فيه الشر بوجه الخير ...وفي منه الغامق الي كله دم بانسانية التخفي... بس الأغرب انه هو الخط الوحيد إلى تنوع لونه ...بجوز لأنه معناه البشر وهم أساس الكون ...اللون الأبيض الساطع في كل نواحي هالكره ... يااااااه ليه هيك بعيد عن الخطوط لملونه ... زي كأنه تايه بدنيته عم بدور ع مكان بين هالخطوط ما لقاه ...هالابيض عم بحاول يستقطب الانسانية وهالديانات وينشر خط الخير عنده بس الألوان مش متناسقه معه وعم بتتزحلقوا بعيد عنه خاصة الاحمر ...زي كأنه هالخط الانساني المزاجي عم بعكر علی صفاء معناه...عم بلاحظ خط الاصفر  للعادات والتقاليد مرسوم حولين الخط الاحمر ...يعني بشريه بنفسية مع عادات مصنوعة من أيادي بشرية منها ظالمة وقاتله ومنها شركسية فيها حلاوة الخطف مع الشهامه ...كل هالعالم حكايته يثبت الخير أو الشر بطريقته ...حتى أنه رسم حدوده علی خريطته وبده كيان كوني مفتعل بذريعة الخير الرباني الديني .. يا الهي عم ببعد هالكره عن ادي ....بدي ارجعها لاني لقيت العالم عم بوجع دماغي لاني بشوف مجموعة خطوط مداخله ببعضها عم بتخرمش بعض ... وكلها بين ايد كره كبيرة عم بتلف وكأنها بتقلنا هالعالم كله تكرار لانها من صناعة هالبشر...معناته رح يكثر القتل ...والديانات رح تتقمص أدوار ربانية ...والبشر رح يستنجدوا بشرهم مشان يثبتوا خيرهم ... وهالعالم لساته عم بدور بحركة ايد عفويه....ورح  ايضل في خربشة ديانات مع الذات البشرية بكل حركة دورية لكرة العالم.